صدر پاران واپڊا چيئرمين ليفٽيننٽ جنرل سجاد غني (رٽائرڊ) کي پي اي سي ايڪس لينس ايوارڊ عطا

اسلام آباد – 22 – جنوري (اي پي پي) صدر ڊاڪٽر عارف علوي واپڊا چيئرمين ليفٽيننٽ جنرل سجاد غني (رٽائرڊ) کي ايوان صدر ۾ منعقد ٿيندڙ تقريب ۾ پِي اِي سي ايڪس لينس ايوارڊ عطا ڪيو. واپڊا پڌرائي موجب واپڊا چيئرمين کي اهو ايوارڊ ”لائيف ٽائيم اچيومينٽ ايوارڊ“ جي ڪيٽيگري ۾ نمايان قومي خدمتن، سول انجنيئرنگ جي شعبي ۾ سندس سروسز، قومي مقصد ۾ قيادت ۽ لڳاءُ جي بنياد تي ڏنو ويو آهي. ايوارڊ عطا ڪرڻ جي تقريب پاڪستان انجنيئرنگ ڪائونسل جي اهتمام هيٺ ٿي. واپڊا چيئرمين جي حيثيت سان انجنيئر ليفٽيننٽ جنرل سجاد غني (رٽائرڊ) واپڊا کي هڪ ڪارائتو ۽ بهترين نتيجا ڏيندڙ ادارو بڻائڻ جي لاءِ غيرمعمولي قائداڻي ۽ بهترين انتظامي صلاحيتن جو مظاهرو ڪيو. هن پاڻي ۽ پن بجلي جي شعبن ۾ قومي اهميت جي منصوبن تي تعميراتي ڪم جي رفتار کي وڌايو. مالي ڏکيائين جي باوجود واپڊا جي 8 تعمير هيٺ منصوبن تي تعميراتي سرگرميون بنا رڪاوٽ جاري آهن، جيڪي بطور چيئرمين سندس وڏي ڪاميابين مان هڪ آهي. واپڊا جا تعمير هيٺ منصوبا 2024ع کان 2029ع تائين مرحليوار مڪمل ٿيندا ۽ انهن جي تڪميل تي ملڪ ۾ پاڻي ذخيرو ڪرڻ جي صلاحيت ۾ 9.7 ملين ايڪڙ فوٽ جڏهن ته سستي پن بجلي پيدا ڪرڻ جي صلاحيت ۾ اٽڪل 10 هزار ميگاواٽ اضافو ٿيندو. انجنيئر ليفٽيننٽ جنرل سجاد غني (رٽائرڊ) جي سربراهي ۾ داسو هائيڊرو پاور پراجيڪٽ تي فيبروري 2023ع ۾ جڏهن ته ديامير ڀاشا ڊيم تي ڊسمبر 2023ع ۾ دريا جو رخ موڙڻ جو سنگ ميل عبور ڪيو ويو. اميد آهي ته ايندڙ 3 مهينن ۾ مهمند ڊيم پراجيڪٽ تي پڻ درياءَ جو رخ موڙڻ جو اهم هدف حاصل ڪيو ويندو. ان نوعيت جي ڪم ۾ عام طور 18 کان 24 مهينن جو عرصو گهربل هوندو آهي. انجنيئر ليفٽيننٽ جنرل سجاد غني (رٽائرڊ) جو تعلق پاڪستان آرمي جي ڪورز آف انجنيئر سان آهي. سندس پيشيواراڻي تجربو 44 سالن تي ٻڌل آهي. هن ملٽري ڪاليج آف انجنيئرنگ رسالپور مان گريجوئيشن ڪئي جڏهن ته يونيورسٽي آف انجنيئرنگ اينڊ ٽيڪنالاجي لاهور مان ماسٽر جي ڊگري حاصل ڪئي. هڪ نوجوان انجنيئر جي حيثيت سان هن آزاد ڄمون ۽ ڪشمير ۾ ڪيترائي منصوبا تعمير ڪيا. 03 – 2002ع دوران ڪمانڊر ڪور انجنيئر جي حيثيت سان هن تعمير ڪراچي پروگرام جي لاءِ سهولتون پهچايون ۽ سنڌ صوبي ۾ آبپاشي ۽ پاڻي جي نيڪال جي ڪيترن ئي منصوبن جو جائزو ورتو. 13 – 2010ع ۾ ڪوارٽر ماسٽر جنرل طور هن آرمي جي آپريشنل ۽ لاجسٽڪ انفراسٽرڪچر جي تعمير ۽ سارسنڀال ۾ پڻ اهم ڪردار ادا ڪيو. اين ايل سي جي آفيسر انچارج جي حيثيت ۾ هن پنجاب ۽ ٻين صوبن ۾ ڪيترن ئي وڏن منصوبن کي تڪميل تائين پهچايو. هن قطر ۽ سعودي عرب ۾ پاڪستان جي تعميراتي ڪمپنيون جي سربراهي پڻ ڪئي.

مضمون کا ماخذ : پاور بال کے نتائج

متعلقہ مضامین