لاہور۔31اکتوبر (اے پی پی) نگراں وزیر اعظم انوارالحق کاکڑ آکھیا جو پاکستان ہر محاذ تے فلسطین کیتے آواز چیندا پئے۔ غزہ اچ فوری جنگ بندی تھیوݨی چاہیدی اے، موثر انتظامی اقدامات نال کھاوݨ پیوݨ دی شہیں دے نرخ ڳھٹ تھین۔ انتخابات دی تاریخ الیکشن کمیشن ݙیسی جڈانجو نگراں حکومت لیول پلیئنگ فیلڈ یقینی ٻݨیسی۔ آئی ایم ایف دا وفد ݙو نومبر کوں پاکستان دا دورہ کریسے۔ ایس آئی ایف سی سرمایہ کاری کیتے ہک اہم پلیٹ فارم اے۔ سمگلنگ معاشی ترقی اچ ہک وݙی رکاوٹ اے۔ نگراں حکومت دے موثر انتظامی اقدامات نال کھاوݨ پیوݨ دی شہیں دے نرخ ڳھٹ تھین۔ او منگل کوں میو ہسپتال دے دورہ دے موقع تے میڈیا نال ڳالھ مہاڑ کریندے پئے ہن۔ وزیراعلیٰ پنجاب محسن نقوی وی انہاں دے نال ہن۔ فلسطین تے اسرائیلی مظالم بارے ہک سوال دے ولدے اچ انہاں آکھیا جو پاکستان سعودی عرب نال رَل تے او آئی سی دے اڄوکے ہنگامی اجلاس دی میزبانی کیتی اے، غزہ تے او ائی سی اجلاس اچ پاکستانی وزیر خارجہ بھرپور نمائندگی کیتی اے۔ انہاں آکھیاجو پاکستان اسرائیلی جارحیت دی سخت مذمت کریندے۔ اساں ہر محاذ تے فلسطین کیتے آواز چاتی اے۔ ہک سوال دے ولدے اچ انہاں آکھیا جو کوئی وی ملک غیر ملکیاں کوں غیر قانونی رہݨ آپݨے ملک اچ موکل نی ݙیندا، اے تاثر غلط اے جو رجسٹرڈ افغان مہاجرین کوں واپسی ٻھیجا ویندا پئے۔ غیر قانونی رہݨ آلے سارے تارکین وطن کوں واپس انہاں دے ملکاں اچ ٻھیجا ویسی۔ ہک سوال دے ولدے اچ انہاں آکھیا جو انتخابات دی تاریخ الیکشن کمیشن ݙیسی جڈانجو نگراں حکومت لیول پلیئنگ فیلڈ یقینی ٻݨیسی۔
