اسلام آباد۔1نومبر (اے پی پی):وزیراعظم عمران خان معاشی ٹیم کوں ہدایت کیتی اے جو عام آدمی کوں ریلیف ݙیوݨ کیتے ہرممکن اقدامات تے عملدرآمد یقینی بݨایا ونڄے، معاشی ترقی کیتے اہم میکرو اکنامک اشاریں دے استحکام تے بھرپور توجہ مرکوز اے۔ سنوار کوں وزیراعظم عمران خان دی صدارت اچ ملک دی مجموعی معاشی صورتحال تے جائزہ اجلاس منعقد تھیا ۔ اجلاس اچ وفاقی وزیر اقتصادی امور عمر ایوب خان، وفاقی وزیر توانائی محمد حما اظہر، وفاقی وزیر صنعت و پیداوار مخدوم خسرو بختیار، وفاقی وزیر اطلاعات و نشریات چوہدری فواد حسین، وفاقی وزیر قومی غذائی تحفظ سیّد فخر امام، وفاقی وزیر منصوبہ بندی، ترقی و اصلاحات اسد عمر، مشیر تجارت عبدالرزاق دائود، مشیر خزانہ شوکت فیاض ترین، وزیراعظم دے معاون خصوصی ڈاکٹر شہباز گل، گورنر سٹیٹ بینک ڈاکٹر رضا باقر تے اعلیٰ حکام شرکت کیتی۔ وزیراعظم کوں معاشی ٹیم دی طرفوں بین الاقوامی مارکیٹ اچ مہانگ اتے ودھدی پٹرولیم مصنوعات دیاں قیمتاں تے بریفنگ ݙتی ڳئی جݙاں جو انہاں کوں ملک دی مجموعی اقتصادی صورتحال تے وی بریفنگ ݙتی ڳئی۔ وزیراعظم عمران خان ایں موقع تے آکھیے جو حکومت کورونا وائرس دی وبا نال نبݨݨ کیتے مثالی اقدامات چاوے، کورونا وائرس دی وبا اتے بین الاقوامی مارکیٹ اچ کھاوݨ پیوݨ دیاں چیزاں تےپٹرولیم مصنوعات دیاں قیمتاں اچ تکھے ودھارے دے باوجود حکومت قیمتاں کوں گھٹ رکھݨ کیتے اقدامات کریندی پئی اے ۔ وزیراعظم آکھیے جو معاشی ترقی کیتے اہم میکرو اکنامک اشاریں دے استحکام تے بھرپور توجہ مرکوز اے۔انہاں معاشی ٹیم کوں ہدایت کیتی جو عام آدمی کوں ریلیف ݙیوݨ کیتے ہرممکن اقدامات تے عملدرآمد یقینی بݨایا ونڄے۔
